Vigo
A Xunta pagou 194,7 millóns a Ribera Salud en 2025 para financiar o maior hospital concertado de Galiza

A Xunta de Galiza de Alfonso Rueda, a través do Servizo Galego de Saúde (Sergas), e o Hospital Povisa, propiedade de Ribera Salud, asinaron en abril deste mesmo ano un novo contrato de prestación sanitaria por 195 millóns de euros para dous anos, que entrou en vigor a pasada primavera. O acordo consolida a Povisa como o gran hospital concertado da área sanitaria de Vigo, cunha poboación asignada de arredor de 116.000 persoas e xestionado polo grupo cuxo CEO, Pablo Gallart, ordenou aos seus traballadores do Hospital de Torrejón (Madrid) rexeitar pacientes para gañar máis, como testemuña a información publicada este mércores polo diario El País.

Na investigación, revélanse uns audios que amosan ao CEO do grupo Ribera Salud obrigando a subir as listas de espera a costa de realizar menos intervencións e rexeitar pacientes no Hospital público de Torrejón, cuxa xestión está nas súas mans. Unha xestión da que se encargan desde 2009, data na que o expresidente da entidade, Alberto de Rosa, asinara un contrato co por aquel entón conselleiro de Sanidade, Juan José Güemes, para a construción deste hospital e a súa xestión durante os próximos 30 anos, por un valor de 2.127 millóns de euros.

O modelo, en Galiza, non é exactamente o mesmo aínda que se lucren os mesmos. Ata agora, o Sergas pagaba unha cantidade fixa por cada paciente adscrito ao hospital. Co novo contrato, o pago dependerá de cada proceso sanitario realizado. A Xunta sostén que o cambio responde a recomendacións de control orzamentario e de mellora de eficiencia, pero implica un xiro que podería alterar as prioridades asistenciais. De feito, fai apenas uns meses, un terzo dos médicos de urxencia do hospital presentaron a súa dimisión fronte ao modelo sanitario aupado e consolidado por Fraga e Feijóo, respectivamente.

O custo anual situarase nuns 97,5 millóns de euros, o que supón un aumento aproximado do 17% respecto ao acordo anterior. Ao mesmo tempo, a poboación asignada está diminuíndo —actualmente sitúase en torno a 114.000 usuarios polo goteo de solicitudes de traslado aos hospitais públicos— o que incrementa a presión para que o hospital aumente a actividade se quere alcanzar os niveis de facturación pactados.

Un modelo que xera dúbidas e riscos

O paso dun sistema per cápita a un baseado en actividade abre a porta a un problema coñecido: o incentivo a realizar máis procedementos para garantir ingresos, incluso cando non son estritamente necesarios. A propia estrutura do contrato fomenta que a prioridade non sexa a necesidade clínica, senón o volume de procesos facturables.

Aínda que a Xunta remarca que se reforzarán os mecanismos de supervisión, a experiencia noutros territorios demostra que estes controis raramente bastan para impedir abusos ou desviacións.

O precedente de Madrid: cando o negocio prevalece sobre a saúde

O novo contrato con Povisa agora vólvese ler nun contexto delicado para a colaboración público-privada en sanidade. Este mércores, revelouse a mencionada gravación interna do grupo Ribera Salud —propietario tamén de Povisa— na que o seu director xeral ordenaba rexeitar pacientes e aumentar as listas de espera para mellorar os resultados económicos do centro de Torrejón de Ardoz.

O escándalo en Madrid coloca baixo unha intensa luz de alerta calquera contrato que incentive a actividade por encima da necesidade real, especialmente cando se asina coa mesma empresa implicada nesas prácticas. Nin o presidente da Xunta, Alfonso Rueda, nin o seu conselleiro do ramo, Antonio Gómez Caamaño, fixeron ningunha declaración pública ao respecto aínda.