A Coruña
Nace na Coruña unha plataforma para apoiar ás persoas sancionadas polas protestas contra Vox

Dez días despois das mobilizacións contra o acto de Vox na praza de María Pita, nace a Plataforma Antirrepresiva da Coruña (PAC). A iniciativa preséntase para dar cobertura ás persoas represaliadas polos feitos do 21 de outubro, denunciar a actuación policial e artellar unha resposta colectiva fronte ao que consideran unha criminalización crecente da organización social e política na cidade.

O nacemento da plataforma chega despois dunha xornada que deixou decenas de persoas feridas, algunhas delas menores. A Coordinadora da Mocidade Socialista, unha das organizacións convocantes, recompilou testemuños gráficos das dúas cargas da UIP da Policía Nacional: a da mañá, en María Pita, e a da tarde, diante da Subdelegación do Goberno. O caso máis grave é o dunha muller que recibiu o impacto dunha bala de goma no ollo dereito. 

O delegado do Goberno en Galicia, Pedro Blanco, defendeu esa intervención e achacou os incidentes a un grupo reducido de “radicais e antisistema”. Segundo a versión gobernamental, a policía actuou cando xa se marchara a comitiva de Vox e porque algúns manifestantes lanzaron pedras, mesas e cadeiras. Blanco cualificou a actuación como a que “tiña que ser” e matizou que se tratou máis de “disolver” que de cargar, para evitar unha “batalla campal”. 
Cobertura para as sancións

Os colectivos que se concentraron na praza —entre eles Xesta, o Sindicato de Vivenda da Coruña, CGT, CNT, a CMS, Galiza Nova e a Asemblea Antiimperialista da Coruña— sosteñen o contrario. Din que a resposta dalgúns manifestantes veu despois da carga e denuncian que a policía disparou pelotas de goma a curta distancia e dirixidas á cabeza e ao corpo.

A PAC sitúa a súa creación nese contexto e subliña dous elementos; a campaña de sinalamento mediático contra os sectores antifascistas e as declaracións do delegado do Goberno, que, segundo a plataforma, avaliou positivamente a actuación da UIP e anunciou novas detencións. Tamén critican o papel dos grandes medios na difusión de discursos que, din, criminalizan o antifascismo e as organizacións políticas e sociais.

A prioridade inmediata é dar cobertura aos procedementos sancionadores que poidan notificarse nas vindeiras semanas, acompañar as persoas encausadas e axudar a asumir os custos derivados da represión. Mais a plataforma di que non quere quedar nos feitos do 21O, e que aspira a consolidarse como espazo de solidariedade, autoorganización e unidade política da clase traballadora.

Desde a PAC interpretan o ocorrido como un avance das prácticas represivas do Estado e dun modelo policial orientado ao control social e á desmobilización política. Advirten dun “xiro autoritario” que, din, se concreta na Lei mordaza e no endurecemento do Código Penal, e de actuacións policiais, xudiciais e económicas dirixidas contra quen se mobiliza.

A plataforma recoñece que o traballo esixirá continuidade e organización, e propón unha resposta social e política ampla arredor do antifascismo e da defensa dos intereses da clase traballadora. O seu lema resume o propósito: “Defender a quen loita é defender os dereitos de todas”.