Energías renovables
Sabucedo visibiliza a resistencia colectiva fronte á burla verde dos macroproxectos eólicos

O Encontro Burla Verde de Sabucedo (A Estrada) reuniu o pasado 29 de abril a máis de 50 colectivos galegos que se resisten a aceptar o sacrificio do territorio a prol do modelo de transición enerxética que promoven desde a Administración estatal e autonómica. Eólicos si, pero non así foi a frase máis escoitada neste encontro cultural e reivindicativo contra a gran burla verde da transición enerxética. 

Guerra na pesca e no ecoloxismo polo novo mapa da eólica mariña

Javier H. Rodríguez

Medio ambiente

Enerxías renovables Guerra na pesca e no ecoloxismo polo novo mapa da eólica mariña

Javier H. Rodríguez

Os Plans de Ordenación do Espazo Mariño dan luz verde á instalación de aeroxeradores en 4.948 quilómetros cadrados de litoral con influencia en reservas naturais e caladoiros, especialmente en Galicia e Asturias

O curro de Sabucedo, escenario da mítica e internacionalizada Rapa das Bestas, converteuse nun simbólico espazo para resignificar a loita popular contra o modelo depredador que implica a masiva industrialización do territorio galego con parques eólicos e ameaza ecosistemas, modos de vida e paisaxes naturais con enorme valor etnográfico e identitario. Resoaban as palabras do cineasta Rodrigo Sorogoyen cando recolleu este ano o Goya á mellor dirección e aproveitou a ocasión para criticar a expansión sen control de parques eólicos pola xeografía galega –tamén nos montes de Sabucedo–, mais desde a organización se reivindicaba o legado da resistencia colectiva contra a ignominia que supuxo a reacción política na catástrofe do Prestige hai dúas décadas. A burla negra converteuse en burla verde para reactivar a resposta da cidadanía fronte a unha ameaza común, repartida por todo o rural galego e máis perigosa no longo prazo que o chapapote pola destrución definitiva do medio natural que implican os macroproxectos enerxéticos no territorio.

Desde a organización reivindicábase o legado da resistencia colectiva contra a ignominia que supuxo a reacción política na catástrofe do Prestige hai dúas décadas

A festa estaba xustificada polo encontro de proxectos de resistencia e alternativa, pero alén das actuacións musicais do Curro Cabaret e dos momentos de lecer na carballeira houbo unha mesa redonda que xuntou a representantes de diferentes colectivos sociais para compartir as súas inquedanzas sobre os últimos desenvolvementos no sector enerxético. A forza da unión desprendía un optimismo agridoce sobre a capacidade de acción colectiva, a teor da recente autorización de 75 parques eólicos na xeografía galega. 

Aranza González, portavoz da plataforma veciñal Asociación Aire Limpo nas mariñas-Mandeo e veciña afectada polo proxecto eólico do Monte do Gato, alertou da posibilidade de que moitos destes macroproxectos de enerxías renovables incentivados con subvencións públicas non sexan completados pola especulación capitalista e a xeoestratexia do propio sector enerxético e avogou por continuar a loita popular por vía xudicial, aínda que este camiño exixa recadar cartos a través do crowdfunding. Na palestra tamén estaba Torcuato Teixeira, portavoz da plataforma en Defensa da Pesca e dos Ecosistemas Mariños, que expuso os riscos da expansión da eólica mariña para a biodiversidade e os modos de vida nas costas galegas; así como representantes da resistencia veciñal contra agresivos proxectos de minaría como o de Touro-O Pino (A Coruña). Para visibilizar os efectos da minaría sobre a poboación interviñeron tamén Juan Francisco Ortuño, presidente da plataforma de afectadas pola contaminación de metais pesados en Llano del Real (Murcia), e Nayeli Alejandra Trejo, que falou da expansión territorial da minería de metais preciosos en México e da resistencia das comunidades locais e das defensoras da terra para contextualizar a nivel global o espolio e a depredación de recursos que supón a bur(bul)la verde, como se podía ler nos carteis informativos sobre o evento.

Houbo unha mesa redonda que xuntou a representantes de diferentes colectivos sociais para compartir inquedanzas sobre os últimos desenvolvementos no sector enerxético

Arredor do curro que acolle anualmente a Rapa das Bestas organizáronse os colectivos sociais para informar sobre os macroproxectos enerxéticos, tanto de enerxía eólica como de minaría industrial, que ameazan o territorio, recollendo sinaturas e anunciando próximas xornadas e convivencia e manifestacións, como as que terán lugar en Negueira de Muñiz (Lugo) o 6 de maio e na propia capital provincial de Lugo o vindeiro 21 de maio, unha semana antes das eleccións municipais. Fronte a este modelo depredador, reivindicouse o espírito comunitario na xestión de recursos.

Polo Curro Cabaret pasaron numerosos artistas galegos de diferentes xeracións como Uxía e Xurxo Souto, protagonistas do movemento da cultura galega contra a burla negra do Prestige hai vinte anos, e Sheila Patricia ou Zeltia Irevire, talentos emerxentes e igualmente comprometidos con esta causa. Retrousos a ritmo de folk e blues como Eólicos non, non, non ou Ten coidado con quen te xuntas, ten coidado cos da Xunta, entoados por Zeltia Irevire e moi aplaudidos polo público de Sabucedo, van camiño de converterse en himnos da loita contra este modelo de transición enerxética que non ten en conta as necesidades e os intereses da poboación. Desde o gremio cultural que participou neste Encontro Burla Verde de Sabucedo, con todo, reivindicouse expresamente a loita contra o espolio e a depredación enerxética en comunidade, nas rúas e nas urnas.