Galicia
Vigo, A Coruña e Ourense mercaron material policial a Israel por medio millón de euros en só catro anos

A masacre de Israel sobre o pobo palestino non comezou o sete de outubro, senón hai xa 76 anos. E nos últimos catro, tres das grandes cidades galegas tiveron tempo para mercar material policial a Israel por valor de máis de medio millón de euros. Fundamentalmente, destinados a mercar chalecos antibalas para as súas policías locais e portuarias.

Todos eles foron facturados á empresa armamentística israelí Guardian Homeland Security SA, sinalada tamén por ser adxudicataria, o pasado 13 de abril, da compra de placas balísticas nivel IV, adquiridas polo ministerio do Interior. Un feito que xerou un terremoto político en Madrid, con ameazas de ruptura dende Izquierda Unida e algunhas menos impetuosas dos deputados e deputadas que representa a vicepresidenta segunda, Yolanda Díaz, en Sumar.

Os grandes adxudicadores galegos son: o Goberno de Vigo de Abel Caballero, cunha licitación de 205.069,28 euros; e o da Coruña, de Inés Rey, con outro contrato por valor de 208.500 euros. Ambos, Caballero e Rey, son os políticos do PSdeG-PSOE que máis poder ostentan neste momento en Galicia tras a repetida debacle electoral do partido que dirixe José Ramón Gómez Besteiro na súa terra: hoxe apenas contan con nove dos 75 escanos que forman o Parlamento galego. Non obstante, dende as alcaldías das dúas cidades máis poboadas manexan os maiores orzamentos dos municipios galegos.

En Ourense, a cidade gobernada polo partido dereitista e populista de Gonzalo Pérez Jácome, o Estado de Israel tamén fixo caixa cunha compra de 82.237,65 euros tamén de equipos materiais para a súa policía local.

No caso de Vigo, a memoria económica xustifica o gasto para a compra de ata 364 chalecos antibalas para os seus axentes da Policía Local. Segundo a información pública que fixo o Concello no verán de 2024, o cadro de persoal está actualmente formado por 340 axentes, dos que aproximadamente 100 realizan labores de oficina, que non utilizan este tipo de protección, e os outros 240 si son axentes de rúa. Unhas cifras de compra claramente desproporcionadas aos seus usos, tendo en conta, ademais, que boa parte dos efectivos que realizan tarefas de tráfico ou atestados na cidade non adoitan empregalos no seu día a día.

Por parte da cidade da Coruña, a dinámica é similar. O encargo contempla a adquisición de aproximadamente 300 chalecos para o cadro de persoal da súa policía. No ano 2023, o último actualizado oficialmente polo Concello de Inés Rey, o número total era de 328. A desproporción é análoga coa de Vigo, aínda que o Goberno de Caballero suxire unha motivación, tamén, antiterrorista, a pesar de que non houbo na cidade ningunha ameaza das que formula: “No seo dunha sociedade hiperconectada e con acceso instantáneo á información dispoñible sobre calquera materia obxecto da pura imaxinación, que a actual ameaza terrorista de natureza xihadista de ámbito global non dispoña de modo algún dos datos relativos á adquisición dos chalecos”.

En Ourense, máis do mesmo. O Goberno de Jácome adxudica, o 20 de outubro de 2023, apenas dúas semanas despois do agravamento da masacre de Israel sobre o pobo palestino en Gaza, a compra de cen chalecos antibalas de características similares aos anteriormente descritos. Na cidade termal, os efectivos, entre oficina e rúa, apenas chegan aos 114 axentes. A diferenza dos contratos de Vigo e A Coruña, a opacidade do líder de Democracia Ourensana agrávase: nin sequera achega á plataforma de contratos do sector público nin a memoria xustificativa do gasto nin tampouco a memoria económica.

Por último, para pechar o negocio policial de Galicia co Estado sionista, dúas autoridades portuarias asinan adxudicacións similares ás mencionadas nos concellos: Ferrol e A Coruña. No caso de Ferrol - San Cibrao, o contrato, ademais de incluír chalecos, engade talís, grilletas, fundas de grilletas, portaluvas, lanternas con funda e cintos tácticos. Todo por 34.578,17 euros. En cambio, o da Coruña ascende a 60.947,70 euros con propósitos similares.

Outros contratos millonarios pendentes co Estado

Segundo revelou elDiario.es, a semana pasada, concretamente o 16 de abril, pechouse a compra de munición israelí por un importe superior aos cinco millóns de euros. A publicación oficial deste contrato apareceu dous días máis tarde, o Venres Santo —festividade estatal—, na Plataforma de Contratación do Sector Público. Esta operación non foi a única recente con empresas de Israel.

En decembro, o Goberno español asinou un acordo con Elbit Systems LTD, unha empresa israelí, para a subministración e mantemento de compoñentes clase IX do morteiro embarcado Cardom, por un total de 50.000 euros. Así mesmo, en agosto de 2024 levouse a cabo outra compra de equipamento militar, esta vez a Netline Communications Technologies, valorada en 390.000 euros, co obxectivo de incorporar sistemas de guerra electrónica e dispositivos de contramedidas.

Ademais, o 13 de abril formalizouse unha adquisición por parte do Ministerio do Interior: placas balísticas de nivel IV, subministradas pola compañía israelí Guardian Homeland Security, cun custo de 319.331 euros.

En total, e de acordo cos datos do Centre Delàs, desde outubro de 2023 concretáronse 31 contratos de compra de material militar a Israel. Deles, dez foron asinados despois de outubro de 2024, a pesar de que o Ministerio de Defensa anunciara a suspensión deste tipo de adquisicións.