Justicia
A xustiza madrileña reabre a causa contra Suso de Toro por delito de odio tras unha denuncia do lobby sionista ACOM

A Audiencia Provincial de Madrid acordou reabrir as dilixencias contra o escritor galego Suso de Toro a raíz da denuncia presentada polo lobby sionista Acción e Comunicación sobre Oriente Medio (ACOM), que lle atribúe un delito de odio de carácter antisemita por varias mensaxes publicadas en redes sociais entre febreiro e marzo de 2024.

As publicacións sinaladas polo grupo de presión proisraelí incluían referencias a Israel como “un estado xenocida” e comparacións entre as actuacións do Estado israelí en Gaza e o nazismo. Agora, a Sección nº7 da Audiencia Provincial de Madrid considera que a decisión adoptada en maio de 2025 de sobreseer provisionalmente e arquivar o procedemento foi “prematura”.

Así consta nun auto datado en xullo de 2026 cuxo contido trascendeu esta mesma semana. Os maxistrados consideran que, antes de pechar o procedemento, debería terse tomado declaración ao escritor para coñecer “a intención das súas manifestacións”. Así mesmo, entenden necesario aclarar se De Toro chegou a rectificar algunha ou todas as publicacións denunciadas, algo que, segundo recolle a resolución, non aparece acreditado na causa máis alá dunha información xornalística.

Deste xeito, a Audiencia estima o recurso presentado por ACOM e conclúe que a posible existencia dun delito foi valorada sen dispoñer de elementos suficientes para adoptar unha decisión definitiva.

De Toro afirma que aínda non recibiu unha comunicación oficial

O propio escritor referiuse esta semana á reapertura do procedemento a través das súas redes sociais. Con todo, precisou que aínda non recibiu ningunha comunicación oficial dos tribunais e que a información da que dispón procede da comunicación difundida por ACOM.

A organización, que se presenta como a principal entidade proisraelí de referencia en España, recibiu favorablemente a decisión da Audiencia Provincial e considérao un “importante respaldo xudicial” á posición que vén defendendo desde o inicio do procedemento.

De Toro, pola súa banda, respondeu publicamente a estas afirmacións mostrando a súa preocupación polas posibles consecuencias da reapertura do procedemento. “Que me supón isto? Que consecuencias me trae? Non o sei. De entrada, introduce unha nova preocupación na miña vida”, sinalou.

O escritor tamén apuntou que, se finalmente é citado para declarar ante a Audiencia Provincial de Madrid, coñecerá entón o alcance da decisión xudicial. Na súa mensaxe afirmou, ademais: “Non é a primeira vez que o Estado de Israel me intimida cun dos seus instrumentos”.

Respecto ás súas publicacións, De Toro rexeitou calquera posibilidade de retractarse das comparacións que estableceu entre o nazismo alemán e as actuacións do Estado israelí en Palestina. “Debo arrepentirme de ter escrito comparacións entre o nazismo alemán e o que fai o Estado sionista en Palestina? Non me podo nin me debo arrepentir”, concluíu.

A reapertura da causa tamén provocou reaccións de respaldo a Suso de Toro. O Bloque Nacionalista Galego (BNG) expresou a súa “máis firme solidariedade” co escritor e cualificou de “profundamente preocupante” que a denuncia de crimes contra a poboación civil e a defensa dos dereitos humanos poidan ser interpretadas como unha forma de incitación ao odio antisemita. A Asociación de Escritoras e Escritores en Lingua Galega (AELG) tamén trasladou publicamente o seu apoio ao autor compostelán.