Laboral
Condenan a Mercadona por non pagarlle a prima anual a unha traballadora de Ourense pola súa afiliación sindical

As resolucións xudiciais contra Mercadona por vulnerar a liberdade sindical acumúlanse nos últimos meses. A mais recente procede dun xulgado do Social de Ourense, que volveu condenar á empresa por represalias contra unha traballadora afiliada á CIG. O fallo considera acreditado que a compañía lle negou de maneira discriminatoria unha prima de 5.000 euros e obrigaa non só a aboala, senón tamén a indemnizala con outros 30.000 euros pola vulneración dos seus dereitos fundamentais.

Non se trata dun caso illado. Na provincia de Ourense, os xulgados do Social números 1 e 3 xa ditaran sentenzas condenatorias por diferentes vulneracións de dereitos sindicais cometidas pola cadea de supermercados.

Así mesmo, o Tribunal Superior de Xustiza de Galiza (TSXG) confirmou noutra resolución que o despedimento dun traballador estaba directamente relacionado coa súa participación como candidato da CIG unhas eleccións sindicais. Agora, o xulgado do Social número 4 súmase a esta liña de pronunciamentos xudiciais.

A traballadora afectada levaba na empresa desde 2016 e contaba con avaliacións positivas sobre o seu desempeño. Con todo, a comezos de 2025 recibiu unha valoración negativa que lle impediu cobrar a prima anual correspondente a 2024, fixada en 5.000 euros. A empregada estivera de baixa por un accidente laboral e, ademais de estar afiliada á CIG, formou parte da candidatura do sindicato no proceso electoral.

Segundo recolle a sentenza, Mercadona non logrou xustificar de forma obxectiva esa avaliación negativa, apoiándose unicamente nunha entrevista persoal na que se aludía a “unha determinada actitude” da traballadora, un criterio que o xulgado considera dificilmente avaliable. Para o maxistrado, os argumentos achegados pola empresa carecen da entidade necesaria para respaldar a súa decisión: “Existe vinculación entre a denegación da prima correspondente ao ano 2024 e a circunstancia de pertenza ao sindicato CIG e participación no proceso electoral, así como a situación de baixa de longa duración, e o certo é que a acción de Mercadona devén nula por vulneración de dereitos, sen que a proba achegada pola demandada servise para desvirtuar esta conclusión”, reza a sentenza.

O fallo conclúe que existe unha relación directa entre a denegación da prima e a afiliación sindical da traballadora, a súa participación nas eleccións sindicais e a súa situación de baixa prolongada, polo que declara nula a actuación da empresa por vulneración de dereitos fundamentais. En consecuencia, Mercadona deberá pagar a prima debida e aboar unha indemnización adicional de 30.000 euros polos danos causados.