Laboral
Unha traballadora de Stellantis sofre un accidente grave na planta de Vigo e corre o risco de perder un pé

Unha traballadora da planta de Vigo da empresa Stellantis —antiga Citroën— sufriu un grave accidente no transcurso da súa xornada laboral e, á falta de confirmación oficial, os sindicatos CGT e CUT aseguran que podería perder un pé por amputación. Acceder ao detalle pormenorizado dos feitos non é sinxelo, tanto a empresa como a prensa hexemónica en Galiza decretaron o mutis.

De feito, o silencio é tan abraiante, que nin os propios delegados sindicais da factoría galega teñen aínda acceso á información, malia que o incidente produciuse a semana pasada: “Ten narices o tema, nin sequera a nosa delegada de prevención ten aínda datos”, denuncia Vítor Mariño, delegado na planta pola Central Unitaria de Traballadores.

De feito, lamenta Mariño, “publicouse información antes en Francia sobre o sucedido que en Vigo”. O delegado refírese á única comunicación formal do ocorrido que houbo ata agora e da que se fixo a sección de CGT en Stellantis Hordain (Francia). O comunicado relata o accidente: “Mentres o carretilleiro percorría o corredor, este quixo evitar un tren de subministro de paneis de portas que viña en sentido contrario. Viuse obrigado a invadir a zona verde (anchura insuficiente e non conforme) e golpeou a unha empregada que collía obxectos persoais da súa taquilla. Golpeouna no pé. Actualmente está en intervención cirúrxica, pero corre o risco de perder o pé por amputación”. E engade: “Emprenderanse as seguintes accións. Comunicación a toda a liña de mando para a súa difusión aos equipos (peóns e carretilleiros) e a verificación da nosa implantación para corrixir o risco se existe (colocación de barreiras, revisión de percorridos, etc...)”.