Tribunal Supremo
A Fiscalía galega traslada ao Supremo as denuncias polos cambios na sección de eólicos do TSXG

A Fiscalía Superior de Galiza remitiu á Fiscalía do Tribunal Supremo as denuncias presentadas por diversos colectivos sociais e ecoloxistas en relación cos cambios introducidos na distribución de asuntos da Sala do Contencioso-Administrativo do Tribunal Superior de Xustiza de Galiza (TSXG).

A decisión figura nun escrito datado o pasado 29 de maio, cuxa existencia foi dada a coñecer pola Confederación Intersindical Galega (CIG), unha das organizacións impulsoras da denuncia.

Segundo informaron a propia CIG e a asociación ecoloxista Adega, a Fiscalía galega comunicou a integrantes da coordinadora Eólica Así Non a apertura de dilixencias de investigación preprocesual para analizar os feitos denunciados. Porén, o Ministerio Público acordou inhibirse e trasladar toda a documentación ao Tribunal Supremo ao considerar que as persoas sinaladas nas denuncias teñen a condición de aforadas ante a Sala Segunda dese órgano xudicial.

En consecuencia, será a Fiscalía do Supremo a que decida se continúa a investigación sobre os cambios realizados nas seccións do contencioso-administrativo do alto tribunal galego, unha cuestión que xerou polémica en plena vaga de litixios vinculados a proxectos eólicos.

As denuncias apuntaban á posible comisión dun delito de prevaricación. Os colectivos cuestionan a decisión de trasladar os procedementos relacionados coa enerxía eólica da Sección Terceira á Sección Segunda da Sala do Contencioso-Administrativo, unha reorganización impulsada baixo a presidencia de Azucena Recio.

A coordinadora Eólica Así Non sostén que esta modificación na repartición de asuntos se produciu de forma paralela a cambios na composición da sala, entre eles o traslado do maxistrado Luís Villares da Sección Terceira á Cuarta. A xuízo das organizacións denunciantes, estas decisións poderían ter favorecido os intereses da Xunta e de empresas do sector eólico nos procedementos relacionados coas autorizacións de infraestruturas eléctricas.

Ademais de Adega e a CIG, a denuncia foi respaldada por unha vintena de organizacións e plataformas, entre elas o Sindicato Labrego Galego (SLG), Fruga, ORGACCMM, Acouga, Amigas da Terra, a Asociación Vento Libre, a Asociación Fonte Seca, Tarabelada, A.C.I.B.A.L., a Plataforma Eólicos no Morrazo Non, Cerdido Di Non, Ortegal Di Non, a Asociación de Veciños e Veciñas do Couzadoiro, Asociación Lobo, Nova Escola Galega, Amigos do Patrimonio de Castroverde e a Asociación Veciñal Agra do Orzán.