Opinión
Gune autogestionatuen defentsa, feminismoa eta errepresioa

2019ko urtarrilaren hasieran, Aldaketaren Gobernua oraindik agintean zegoela, Iruñeako Alde Zaharrean auzoko eta inguruko militanteek eraikitako Maravillas Gaztetxea hustu zuten. Horren aurrean, herri mugimenduak gogor erantzun zuen. Urteko lehen aste haietan, manifestazioak, elkarretaratzeak, pankartak, prentsaurrekoak, salda eta txokolatea ere izan genituen. Eta, horiekin batera, baita beste hauek ere: botilez eta gomazko pilotez jositako istilu klasikoak, poliziaren bortizkeria, Altsasuko batzokia hormatzea, kazeroladak, errepide mozketak, autobusetan egindako pintaketak, Geroa Bairen fatxadan botatako arrautzak…

“Ekintza zuzena salaketa tresna gisa erabili genuen, bake soziala eta jabetza pribatuaren oinarriak zalantzan jartzeak zerikusi handia baitu feminismoarekin”

Iruditeria kolektibo matxistak erraz bultza gaitzakenez pentsatzera kaputxadunak, ekintzaileak eta batzarretako parte hartzaileak gizonezkoak zirela, esan behar dugu bi aste haietan feministok ere herri borrokan murgildurik ibili ginela. Emakume, bollera eta trans borrokalari gisa agertu ginen espazio publikoan, eta ekintza zuzena salaketa tresna gisa erabili genuen; izan ere, bake sozialaren, jabetza pribatuaren eta legezkotasunaren antzeko oinarriak zalantzan jartzeak zerikusi handia du feminismoarekin.

Horregatik, ekintza feminista ez misto bat burutu genuen: soka bat hartu, eta bi kide Iruñeako Vergel zubian eskegi ziren, eta gainerakook errepidea moztu genuen. Ekintza hark babes zabala izan zuen, eta erreskatea asko korapilatu zen; kolore desberdinetako polizia eta azpiegitura handia behar izan zuten eskegitako bi kideak handik ateratzeko.

Ekintza haren bidez, publikoki salatu nahi izan genuen gure auzoko Gaztetxea hustu izana eta ekintza haren ondorengo militarizazioa. Era berean, azpimarratu nahi izan genuen emakumeak, bollerak eta transak ere buru-belarri aritzen direla lanean Euskal Herriko Gaztetxe guztietan. Borroka mistoetan askotan zailtasunak ageri badira ere, feminismoa okupa hitzaren o letrarekin idazten dugu, eta argi dugu sistema kapitalista heteropatriarkalak dakartzan estatu-indarkeria ororen aurka gaudela; sistema horrek, irensle eta aseezin, gure auzoekin ere espekulatzen du, gure bizitzekin, gure sexualitatearekin, gure gorputzekin eta gainerako esparru guztiekin egiten duen bezala.

Uste baldin bazuten antolatzeko, borrokatzeko eta gure ekimenak garatzeko espazioak eraso ondoren beren lege zibikoei men egin eta isilik geratuko ginela, jai izan zuten. Aurrera egin, eta espazio haiek gure gorputzekin defendatu genituen; izan ere, historikoan zehar feministok ere bizi izan ditugu gaztetxeak, zentro sozialak eta espazio okupatu eta autogestionatuak, eta, beraz, gure lurraldea ere badira.

Eta, nola ez: iskanbilaren ondoren, errepresioa etorri zen. Prozesu penala gainditu ondoren, Euskal Herriko hainbat lekutako hogei kidek 25.000 euroko isuna ordaindu beharko dute, Mozal Legeak eta haren logika suntsitzaileak ezarritako zigorretan; zer-eta ekintza babesteagatik, ez beste ezerengatik. Horrekin batera, errekurtso amaigabeak, ezespenak eta banku kontuen enbargoak ere baditugu. Izan ere, eskura duten armategi polizial eta burokratikoaren bidez askotariko zapalkuntzetan oinarritutako logiken aurkako mehatxu oro desagerraraz dezakete; gainera, guk froga objektiboak aurkeztuta ere, polizien bertsioak egiatzat hartzen dituzte, eta beraiek ere errespetatzen ez dituzten epe eta tranpa burokratikoak erabiltzen dituzte.

Baina beldurrak ez gaitu geldiarazten. Zutik jarraitzen dugu indarkeria ekonomiko horren aurka, eta elkarrekin egiten dugu. Baldintzarik gabeko babesa ematen diguten abokatu nekagaitzak, serigrafiatzaileak, bertsolariak, artistak, lagunak eta hainbat gune sozialetako emakume, bollera eta transak ditugu babesle. Bakartuta nahi gaituen pandemia testuinguru honetan ere, aurrera egiten dugu, errepresioa ikusarazteko eta kolektiboki erantzuteko ekintza handirik egin ezin bada ere. Egun, poltsa serigrafiatuak, laminak eta guk eskuz batutako olibekin egindako olioa saltzen ditugu, eta, aukera dugunean, ekitaldi txikiak antolatzen ditugu, Iruñean zein Euskal Herrian.

“Borrokak ikusezin bihurtu dituzten garai hauetan, eta gure ekintzen ondorioz isunak jaso dituzten lagunak babesteko, esker onez jasoko dugu elkartasun politiko eta ekonomikoa”

Horregatik guztiagatik, borrokak ikusezin bihurtu dituzten garai hauetan, eta gure ekintzen ondorioz isunak jaso dituzten lagunak babesteko, esker onez jasoko dugu elkartasun politiko eta ekonomikoa: donazioak egin, gure poltsak, laminak eta olioa erosi (Katakrak, Halabedi, Eskulanen Etxea edo enkarguz), ekitaldi txikietara gerturatu, proposamen eta ekarpenak egin… Aldez aurretik eskerrak emanez, aurrerantzean antolatuko ditugun jardueretan parte hartzera gonbidatzen zaituztegu. Kolgadxk talde antirepresibotik bultzatzen dugun elkartasun kanpainaren baitan ekarpen ekonomiko edo politikoak egiteko, kolgadxk@gmail.com-en edo @Kolgadxk-en aurkituko gaituzue.

Gora borroka feminista!

Gora okupazioa eta autogestioa!