Laboral
Iberdrola bloquea a subida do IPC aos seus traballadores mentres reparte outros 400 millóns á súa directiva

A tensión laboral en Iberdrola volve escalar. Tras unha década de salarios conxelados e mobilizacións en Euskadi desde 2020, os sindicatos ELA e a CIG uníronse para unha nova xornada de folga. Esta vez coincidindo coa Xunta de Accionistas da enerxética, para denunciar o deterioro das condicións laborais e a perda de poder adquisitivo da plantilla, mentres a eléctrica encadea beneficios récord e aproba millonarios incentivos para a alta dirección. Alí estiveron presentes tanto fóra, con pancartas, coma dentro. Para iso, a CIG cedeu a súa presenza a ELA para que a súa representación puidese entrar e falar diante dos accionistas.

Os sindicatos sosteñen que a empresa mantén desde 2015 unha política salarial baseada en incrementos máximos do 0,7% anual, moi por baixo da inflación acumulada (que sería un 2,1% anual de media segundo o INE). Segundo os datos económicos facilitados pola CIG a O Salto, a plantilla tería perdido preto dun 20% de poder adquisitivo, cun IPC acumulado do 22,77% fronte a unha subida salarial total do 2,83%. Ao mesmo tempo, os beneficios netos de Iberdrola non deixaron de crecer: a compañía pasou de gañar 3.885 millóns de euros en 2021 a unha previsión de 6.285 millóns en 2025, o que suporía máis de 25.000 millóns de euros acumulados no período analizado.

Durante a súa intervención na Xunta de Accionistas, Gorka Lopez del Corral Gutierrez, delegado sindical de ELA en Iberdrola, cargou contra a política laboral da compañía e vinculou directamente o conflito ao incremento dos beneficios empresariais. “Mentres que nos últimos cinco anos os beneficios creceron un 62% e a retribución ao accionista aumentou un 61%, a plantilla de España baixo convenio sufrimos unha perda de poder adquisitivo de máis do 19% respecto ao IPC”, denunciou, e asegurou que “nunca estivera tan baixo o sentimento de pertenza e orgullo a Iberdrola”.

O representante sindical tamén criticou os incentivos aprobados para a dirección da empresa. “Están solicitando a aprobación dunha serie de pagos e incentivos para 400 persoas da dirección que supoñen máis de 400 millóns de euros de custo, mentres negan unha actualización salarial á súa plantilla, que suporía un incremento de dez millóns de euros para máis de 8.000 empregados baixo convenio”, afirmou o representante sindical en referencia a unha medida que desde ISS pediron non aprobar polo risco que supoñía para a compañía. Malia iso, os sindicatos adianten que foi votada a favor pola inmensa maioría dos presentes.

“Mentres a nós nos queren condenar a un empobrecemento perpetuo, a alta dirección da empresa repártese bonus de 280 e 400 millóns de euros”, denuncian desde a CIG.

“Non estamos pedindo nada descabelado”, indica a O Salto Fran Puch, delegado sindical da CIG e presente en Bilbao esta sexta feira. “Mentres a nós nos queren condenar a un empobrecemento perpetuo, a alta dirección da empresa repartiuse un bonus extraordinario de 280 millóns de euros e aproban nesta xunta outro bonus extraordinario de 400 millóns”, afirmou o representante, que non descarta ir á folga indefinida se a empresa segue sen negociar. “Cremos que a única maneira é a confrontación, porque está claro que sen loitar non imos lograr nada”, indica.

Desde o sindicato galego lembran que mentres levan 16 meses en negociacións polo convenio, a enerxética segue repartindo dividendos. “Os datos económicos que a propia empresa facilita din que a subida salarial que solicitamos é perfectamente asumible e non pon en risco a viabilidade nin os resultados empresariais”, sostivo.

Este é un novo capítulo de loita despois de que en febreiro, coincidindo co 125 aniversario da creación da compañía, CCOO, UGT e ELA convocasen os 10.000 empregados directos da enerxética a manifestarse en Madrid. E despois de xullo de 2025, onde se convocou a primeira folga da historia desta empresa. Este feito pon de manifesto o crecente malestar sindical pola negociación do convenio colectivo, as políticas retributivas e o reparto de bonus millonarios entre a alta dirección.