Memoria histórica
O PSOE négase a retirar unha cruz franquista na vila coruñesa de Neda que até o PP quere derrubar

A maioría absoluta que o PSdeG-PSOE ostenta no municipio coruñés de Neda foi suficiente para denegar unha moción do BNG que pedía a eliminación da Cruz dos Caídos franquista dunha das prazas centrais do concello. De feito, soamente o Partido Socialista negouse a que se botase abaixo un dos restos máis visibles da ditadura nesta vila mariñeira: até o Partido Popular votou a favor xunto ao BNG e Moveneda.

A pesar de contradicir a última lei de Memoria Democrática, aprobada polo seu propio partido en outubro de 2022, nun comunicado, o goberno local xustificou a súa decisión citando a creación dun “consello sectorial de memoria democrática”, anunciado durante a mesma sesión plenaria, o cal, din, busca fortalecer a participación de organizacións e expertos en proxectos relacionados coa memoria histórica.

Segundo os socialistas, o tema proposto polos nacionalistas sería o primeiro que o consello debería abordar en relación coa eliminación de símbolos da ditadura en espazos públicos. Por esta razón, decidiron non apoiar a proposta, algo que resultou incomprensible para o resto de concelleiros e concelleiras, pero tamén para un dos poñentes, Manuel Monge, sociólogo e membro do colectivo de presos políticos durante a ditadura, que participou na sesión plenaria criticando que o PSOE non brindase o seu apoio á proposta. Ademais, Monge tirou de hemeroteca para lembrarlle á Alcaldía que, en novembro de 2022, o PSOE tamén rexeitou unha proposta similar para retirar a simboloxía franquista e nese momento comprometeuse a convocar de inmediato a comisión municipal de memoria histórica nun texto socialista. Aínda hoxe, máis de ano e medio despois, ninguén sabe nada da amentada comisión.