Elecciones
A esquerda gobernará en cinco das sete cidades galegas

As eleccións municipais en Galiza deixaron dúas sorpresas inesperadas en todas as enquisas. O Bloque Nacionalista Galego colócase como primeira forza de esquerdas na capital, Santiago de Compostela, e gobernará, con toda seguridade, co apoio do PSOE. A outra: o líder do populismo de Democracia Ourensá, Gonzalo Pérez Jácome, gaña as eleccións contra todo prognóstico e a pesar da publicación dos audios nos que se xactaba de saber como branquear diñeiro B.

En números absolutos, o Partido Popular gaña as eleccións na maior parte dos concellos galegos, pero é incapaz de gobernar as sete grandes cidades, con excepción de Ferrol. En total, o PP gañou case 50.000 votos en todo o territorio. Aínda que o gran vencedor é o BNG, que sumou outros 54.000 e 134 novos concelleiros. Por outra banda, o gran perdedor da noite é sen dúbida o PSdeG-PSOE: perde case 90.000 votos e déixase 171 concelleiros, cedendo máis espazo aínda ao BNG para as próximas autonómicas.

Xiro histórico en Santiago de Compostela

A líder do Bloque Nacionalista Galego en Santiago de Compostela, Goretti Sanmartín, gobernará con toda seguridade a capital de Galiza tras un xiro histórico nos comicios deste 28 de maio. O BNG ha sorpassado ao PSdeG-PSOE e colocouse como segunda forza con seis escanos, rompendo a posibilidade de gobernar do Partido Popular.

O actual alcalde e candidato á reelección, Xosé Sánchez Bugallo, anunciou a súa dimisión ao coñecerse os resultados. Non collerá a súa acta de concelleiro: “Creo que cómpre abrir unha nova etapa política en Santiago na que eu xa non estarei. A miña intención é non tomar posesión na nova corporación. Rematarei ou meu mandato o 16 de xuño”. Será a primeira vez que os nacionalistas do BNG accedan ao Goberno da capital galega, onde só actuaran como forza necesaria para os gobernos do PSOE.

Pontevedra queda en mans do BNG: o sétimo mandato de Lores

O nacionalista do BNG, Miguel Anxo Fernández Lores, seguirá sendo alcalde ata polo menos 2027, e sumará case 28 anos gobernando a cidade de Pontevedra. Do mesmo xeito que aconteceu os anteriores comicios, Lores necesitará o apoio do PSOE para gobernar. Para iso terá dúas opcións: integrar no seu Goberno local Partido Socialista ou tamén poderá pactar o apoio nos plenos municipais. Os 9 concelleiros que cultivou nestas eleccións permitiranlle de novo liderar as negociacións co PSdeG que quedará con 5 concelleiros.

Na súa comparecencia pública, unha vez terminado o reconto de resultados, Lores asegurou que os pontevedreses queren que siga gobernando a cidade, tras 24 anos á fronte de consistorio. Pero recoñece o desgate: “Queren que o faga moito mellor”. “Que estean tranquilos os cidadáns, que lles vou facer caso á súa recomendación e tentarei facelo cada vez mellor”, recoñeceu tras agradecer o apoio nas urnas.

Abel Caballero revalida a maioría absoluta, pero toca teito

Cúmprese todo o previsto na cidade máis grande de Galiza. Abel Caballero alcanza unha ampla maioría absoluta, con 19 actas, que lle permitirá volver gobernar a cidade durante outros catro anos. Con todo, o candidato socialista parece tocar teito: a súa formación cede sete puntos e un concelleiro en relación con 2019.

“Non hai precedentes en toda España dun resultado así, só Vigo fai catro anos”, manifestou Caballero ao comparecer ante a prensa entre aclamacións dos seus apoderados e apoderadas. Tras 16 anos consecutivos gobernando en Vigo, parece que o barón socialista comeza a padecer unha erosión, aínda que vigueses e viguesas volveron a apostar por el no 60% das papeletas.

A Coruña: a división sepulta aos partidos á esquerda do PSOE

A Coruña converteuse no exemplo de como non debe comportarse a esquerda. O balance é moi negativo para a esquerda transformadora na segunda cidade de Galiza. As cidadás da Coruña castigaron a división interna no espazo político liderado pola Marea Atlántica no seu momento, deixando fóra do consistorio tanto á Marea Atlántica como á coalición na que participaban os seus antigos socios de Podemos e Esquerda Unida. “Fixemos unha campaña en positivo, cun proxecto de cidade no que cremos, beneficioso para A Coruña. A cidadanía non o viu así. Os resultados son pésimos, sen paliativos, un contexto de fortalecemento dá dereita e retroceso dás forzas progresistas. Asumimos o ditame”, explicou o líder da Marea Atlántica, Xan Xove.

En cambio, a alcaldesa da Coruña, Inés Rey, revalida o seu mandato. Cualificou como un “aval” á xestión dos socialistas os resultados obtidos nestas eleccións municipais, cun incremento de concelleiros, de 9 a 11, e coa opción de gobernar o que lle esixirá un acordo co BNG, que pasa de dous a catro, e cun PP como a lista máis votada, con 12 edís.

Ourense premia a presunta corrupción de Jácome

Ao actual alcalde de Ourense, Gonzalo Pérez Jácome, non lle afectaron o máis mínimo os audios publicados nos que alardeaba de saber como branquear diñeiro en B. Democracia Ourensá, o seu partido populista de dereitas, gañou as eleccións con 10 concelleiros. Pasa de ser terceira forza a primeira subindo un total de 3 concelleiros. Un dato chave para unha lectura provincial e que pon en dúbida se o Partido Popular poderá manter ou non a Deputación de Ourense do clan dos Baltar.

Na súa comparecencia #ante os medios, Gonzalo Pérez Jácome mostrouse interesado en volver a unha segunda etapa á fronte do Concello: “Gustaríame un mandato 2023-27”. Cualificou a campaña de “tremendamente dura”, pero vangloriouse de que “Ourense gritou”. Sobre a representación na Deputación de Ourense, asegurou que subirán un deputado e pasarán de dous a tres.

Lugo mantense en mans do PSOE co apoio do BNG

A socialista Lara Méndez reterá a alcaldía de Lugo se reedita o seu pacto co BNG do seu actual tenente de alcaldesa, Rubén Arroxo. PSOE e BNG sacaron exactamente os mesmos resultados de 2019 ao lograr 8 e 5 edís, respectivamente. O que fai que o PP de Elena Candia quede ás portas de lograr o goberno ao rozar coas súas 12 actas a maioría absoluta, fixada en 13. Os populares quedan cos dous edís que perde Cidadáns, quen, con Olga Louzao á cabeza, desaparece da corporación da capital luguesa e de toda Galiza.

O Partido Popular só gobernará en Ferrol

Aínda que o Partido Popular gañou con diferenza as eleccións municipais en Galiza, só gobernará unha das sete grandes cidades: Ferrol. Polo que José Manuel Rey Varela converterase no próximo alcalde da cidade. Conseguiu a maioría absoluta con 13 concelleiros, fronte a 7 concelleiros do PSOE, 3 do BNG e 2 de Ferrol en Común. Rey Varela logrou o seu obxectivo tras dúas eleccións municipais perdidas. Agora, conta cun amplo respaldo por parte dos ferroláns e ferrolás para poder gobernar sen depender de ningún voto doutras formacións.