Euskal Herria
Ikertzaileek, enpresa pribatuek “zientzia zer izan daitekeen eta zer ez” erabakitzen dutela salatu dute

Euskal Herriko hainbat ikertzaile Bordelen batu dira ostegun honetan 'XXI. mendeko mugaz gaindiko begiradak. Euskal kasuak' nazio arteko kongresuan. Bertan “ezagutzaren produkzioa Euskal Herritik sortu behar dela” aldarrikatu dute. Gainera, ekitaldi hau “ibilbide luzeagoa duen urrats txiki bat” baino ez dela izango aurreratu dute eta “unibertsitate ezberdinetako euskal ikertzaileon arteko lankidetza ehuntzeko bidea marka lezakeen topagunea” bilakatu daitekeela uste dute. Bordeleko Zientzia Politikoetako unibertsitatera EHUko 'Parte Hartuz' ikerketa taldeko eta Subiranotasuna Europako Herrietan masterreko kideak gerturatu dira. 

Iñaki Zaldua, EHUko ikertzaileak dioenez, “zientzia garaiko eta tokian tokiko pertsonon bizitzak hobetzeko baliatu behar den tresna dela uste dugu; hau da, ezagutza pertsonon eta ingurumenaren zerbitzura egon behar luke eta ez aldrebes”. Hala ere, “zentzuzkoa den adierazpen honek XXI. mendeko errealitatearekin talka egiten du”. Izan ere, profesionalek salatzen duten moduan, “zientziaren produkziorik handiena aldizkari zientifiko pribatuen esku egotearen ondorioz, enpresa pribatuek erabakitzen dute zientzia zer izan daitekeen eta zer ez”.

“Euskal Herrian badaude Euskal Herriko begiradatik eta Euskal Herrirako lan egiten duten ikertzaileak”

Ikertzaileak azpimarratzen duen arazo nagusietako bat ezagutza etekin ekonomikoaren menpe egotea da. “Mundu mailako produkzioa arrotza zaigun hizkuntzan eta esparru pribatuko logikekin sortu ohi da. Euskal Herrian badaude Euskal Herriko begiradatik eta Euskal Herrirako lan egiten duten ikertzaileak”, adierazten du. Hori dela eta, “Bordelen batu gara Frantziako eta Espainiako estatuek ezartzen diguten muga politikoa gaindituz, eta, marko soziologiko berri bat sortzeko asmoz”.

Kongresu hau burutzeko Bordele aukeratzea ez da kasualitatea izan. “Garona itsasadarreraino joan gara, bertan, Euskal Herritik sortutako pentsamendua produzitzen delako”, azaltzen du ikertzaileak. Bestalde, Zalduak azpimarratzen duenez “Euskal Herrian erdaraz sortutako kongresuak badira (gaztelaniaz, frantsesez edo ingelesez), zergatik ez da ba Frantziako estatuan euskarazko kongresurik egongo?”. Bere ustean “interesgarriagoa zaigu ulertzea ezagutza bera nondik sortzen den, zertarako eta zergatik, non edo zertan egiten den identifikatzea baino”