Movimiento vecinal
Máis dun ano sen solucións para o paseo de Bouzas

No tramo do paseo entre a igrexa de Bouzas e a Praia de Alcabre, caeu un camiñante o verán pasado. A zona, dentro dun barrio residencial de Vigo, valouse o día despois da caída do viandante e, na actualidade, segue sen posibilidade de acceso. A parte do paseo valada é de dominio público mais conta con titularidade do servizo de Costas, polo que o Concello precisa dunha concesión para poder reparalo. En xaneiro de 2019, o Concello presenta un escrito pedindo a concesión deste espazo a Costas e o propio Porto amósase disposto a facerse cargo das reparacións —a cambio de deixar de pagar un canon—. Porén no escrito non se delimitaba detalladamente a zona nin para cando se faría dita reparación. Por este motivo Costas emite un requerimento de subsanación en febreiro que o concello ainda non contestou.

O mesmo alcalde de Vigo, Abel Caballero, prometeu no pasado mes de xullo que faría algo máis que arranxar as madeiras, asegurando que executaría unha obra no paseo calificada como “excepcional e á altura do que Bouzas se merece: non un paseíño menor como agora”. O rexedor vigués prometeu tamén que non habería limitación orzamentaria para o proxecto. O 1 de setembro Caballero asegurou que o día 5 do mesmo mes ficaría aprobado o proxecto e darían comezo as obras.

Non se presentou aínda o proxecto e nada mudou nos últimos meses no paseo. As veciñas da zona levan máis dun ano sen poder usar o paseo marítimo do barrio. Desde a oposición municipal, Xabier Pérez Igrexas concelleiro do BNG explica que “o Concello non ten a titularidade, e para que poida asumir a reforma, debe ser titular, débese facer a través dunha concesión antes de calquer proxecto”. E enfatiza que “as concesión non se fan en entrevistas aos medios de comunicación”. Tamén destaca que non está “nin sequera” iniciada a tramitación administrativa para que o Concello de Vigo poida asumir a reparación do paseo, polo que asegura, “a reparación vaise demorar aínda máis”.

Abel Caballero, afirmou ante os medios que non puido presentar o proxecto por estar preto da campaña electoral. Pérez Igrexas, pola súa banda, sinala que “pode non facelo publicamente e presentarllo directamente a Costas”, e que “o natural sería que un ano despois, si que soubesemos, polo menos, as intencións do proxecto”. O concelleiro nacionalista asegura tamén que “ninguén pode discutir que desde o 8 febreiro deste ano, o concello de Vigo non moveu un só papel para facer posíbel a concesión que levan meses dicindo que xa está feita”.

Non hai ningún informe técnico que acredite riscos de seguridade

Desde a agrupación veciñal de Bouzas, tal e como explican representantes ao Salto, piden participación cidadá no proxecto, a reparación das madeiras e mantemento do paseo. Tamén destacan que ámbas as bandas do paseo, levan anos en malas condición e sen reparacións. Do mesmo xeito pensan que poda ser que o aceso ao paseo estea restrinxido para evitar o que pasou no concerto de O Marisquiño en 2018 —aínda sen reparar— ainda que conclúan: “non sabemos exactamente por qué está pechado o paseo”. No seu día o Concello pechou este alegando que había problemas de seguridade, mais a día de hoxe non hai rexistros de ningún informe técnico, de ningún departamento municipal, que acredite nos riscos de seguridade. As veciñas aseguran que existe “inacción por parte das administracións”.

Pouco despois do accidente, as veciñas pediron un informe para analizar a estrutura. Nunca se publicou este informe polo que, ao non saber se hai fallo estructural ou non, tampouco se pode estimar o custe total da reparación do paseo. Ademais quen realizou a clausura do paseo non foi a policía local de Vigo —que sería o pertinente— senón a concesionaría de Parques e Xardíns. “Parécenos que está todo moi collido con pinzas”, sinala o concelleiro do BNG.

O movemento dos carteis

A veciñanza de Bouzas organizouse espontáneamente ao longo deste verán para colocar carteis en toda a zona valada. O primeiro día colaron 34 carteis pola mañá mais, na mesma tarde, os operarios do Concello retiráronnos. Dous días despois colocaron 72 carteis —esta vez con alusións á falta de liberdade de expresión—, que volveron ser retirados. Tras isto, as veciñas colaron dous carteis coa lenda: “Quitáronnos os carteis!”. Tras duns días pegaron outros 118 carteis na zona. Veciñas de bouzas, califican o acontecido como “unha resposta ante a falta de liberdade de expresión por parte do Concello”.

Nun manifesto asinado por uns centos de persoas o 17 de xullo, pedíase que se acometese “de forma inmediata á reparación do actual paseo”, mais manténdose “a estructura e deseño actuais para ser respectuosos co medio nas condición actuais da praia”.

A veciñanza califica a retirada dos carteis como un ataque á liberdade de expresión

Esta pasividade coa reparación da estructura acontece mentres, por exemplo, se invirten cinco millóns de euros –de fondos europeos– nas obras da Gran Vía, no centro da cidade. Dita obra ten coma principal actuación a instalación dunha rampa mecánica entre a rúa Maria Berdiales e a rúa Venezuela.

Tamén sorprende o gasto de máis de 800.000 euros nas luces de Nadal deste ano. As obras de colocación destas, comezaron a mediados de setembro. Segundo o Observatorio dos Servizos Urbanos (OSUR), a cidade de Vigo (2,8 euros por habitante) gasta 43 veces máis en luces de Nadal que a de Barcelona (0,06 euros por habitante), tendo en conta que a cidade catalana ten preto de 1,3 millóns de habitantes máis que Vigo.

Con todo, os veciños do barrio de Bouzas colocaron un contador no que indican a cantidade de días que leva pechado o paseo. No centro da cidade, o Concello de Vigo tamén colocou un contador, indicando os días que restan para o encendido das luces, que será o 23 de novembro.