Educación
Ikastetxeak ikasturte amaieran

Amaitu dira eskola egunak, ikasketak, bilerak eta patioko orduak. Antza denez uda heldu da, kostata heldu ere. Momentu ezin egokiagoa urteko balorazioa egiteko eta mahai gainean jartzeko betetako helburuak eta bidetik gelditu diren asmoak. Hauen inguruan lan egiteak, ordea, datorren urterako ildoaren zirriborroa azalarazten du.

Bi izan daitezke guztien gainetik adierazgarrienak, ikusita hezkuntza sistema osatzen duten aktoreen interes eta lana. Eskola jantokien inguruko gatazka modu argian zabaldu da eskola komunitatean, gurasoengan batez ere.

Ikasturtearen hasieran jardunaldi potoloak egon ziren Iruñean, Amaiur Ikastolako Guraso Elkarteak antolatuta. Sortzenek hainbat topaketa eta eztabaida esparru sustatu ditu Euskal Herriko zenbait tokitan eta Mundu Batek egun bateko jardunaldia antolatu zuen ikasturte amaieran Iruñean. Sukalde gabeko jantoki sistemarekin amaitu beharra eta elikadura burujabetza sustatu beharra dira eztabaida honen ideia nagusiak. Esfortzu handia egin bada ere, ez dago eredua aldatzeko asmo edota biderik.

Bigarren gai garrantzitsua jardunaldi trinkoarena izan da. Ikastetxe batean baino gehiagotan, komunitatea apurtu egin da jardunaldi trinkoa ezartzearen aldeko edo aurkako bozketa agertzearekin batera.

Egunerokotasuna eta familien ohiturak aldatzeaz gain, baldintza ekonomiko ezberdina duten ikasleen arteko ezberdintasunak areagotzen dituen erabaki hau eztabaida sakonik gabe eta aurrekonturik gabe ari da gauzatzen egunotan Iruñean. Ez dago ulermen, konpartitze, eztabaidatze eta erabaki hartze prozesu osasungarri eta zabalik honen atzean, bozka soil bat baizik. Burokratizazio garratzenaren bideak besterik ez du hau erabakitzen. Eta ez dago prozesua aldatzerik, egunotan.

Denbora gutxi gelditzen da legealdiaren amaierarako eta horrek arduradun politikoengan presioa eragiten du. Baina hori ez da gure afera. Aldaketarik ez gertatzea ez da aukera bat, eta guk horiek bultzatzeko ardura osoa dugu.