Especulación urbanística
Violenta recollida de firmas para Porto Cabral

Irene baixou facer a compra á tardiña. Media hora despois, dous homes agarrábana e non a deixaban entrar no seu portal. Un deles esmagaba o que levaba na bolsa da compra. “Vaste enterar!”, “isto non vai quedar así!, “eu non me meto no teu traballo”. Minutos antes, eses dous homes falaban das bondades dun proxecto que crearía 4000 mil empregos en Vigo e arredores e daría un impulso definitivo á cidade. Recollían firmas para Porto Cabral.

Porto Cabral quere ser un macrocentro comercial, con instalacións de lecer tales como unha pista de esquí e un lago artificiais, campos de golf ou rocódromos. Os promotores son a joint venture –unha alianza de dúas ou máis empresas– entre as sociedades de investimento Intu Properties PLC (compañía británica que no estado xa manexa Porto Venezia en Zaragoza ou Intu Asturias en Oviedo) e Eurofund. Seus réditos económicos deveñen de construír centros comerciais e logo alugalos ás diferentes marcas. 600 millóns de euros de investimento, nos 300 mil metros cadrados de monte necesarios. “Alá co teu egoísmo” berráronlle a Mónica por non asinar. “Es unha estúpida por non contribuír ao progreso”. Son varios os proxectos das dúas empresas ao longo e ancho do estado.

O proxecto de Porto Cabral entrou na UVI hai anos, debido ao seu difícil encaixe legal. O monte de Cabral é monte comunal, polo que non se pode vender nin expropiar salvo “por causa de utilidade pública ou interese social prevalente”, de acordo coa lei de montes veciñais en man común. Ademais, en 2013 a Xunta de Comuneiros que xestiona o monte rexeitou o proxecto.

Pero, máis que iso, o principal escollo é o PXOM. O Plan Xeral de Ordenación Urbanística de Vigo foi anulado en 2015 polo Tribunal Supremo, e con el a posibilidade de que parte das hectáreas do monte de Cabral fosen destinadas para estes fins. O Concello de Vigo, que non rexeitou o proxecto ata agora, defenderíao cando se redacte a arquitectura do novo PXOM. Pero este vai para longo. A única posibilidade que queda é pór a mira en Santiago de Compostela.

En Vigo hai mar, non nos fai falta unha piscina. Non precisamos máis espazos dese tipo

No 2016, o Parlamento Galego aprobou un mecanismo para legalizar proxectos naqueles concellos co PXOM anulado se tiveran “interese supramunicipal” ou “excepcional interese público”. E aí xurdiu a recollida de sinaturas para avaliar unha Iniciativa Lexislativa Popular, coa Xunta Reitora dos comuneiros detrás, xunto a outras organizacións. Tras varias notas de prensa, Porto Cabral viviu recentemente un rexurdir mediático. Brais asinou por erro. Tras argumentar que, do mesmo xeito que Irene ou Mónica, estaba en contra de proxecto, o home que recollía as firmas cambiou o discurso, confundíndoo e facéndolle crer que era unha recollida en contra do proxecto. “A min páganme!” recoñeceu un dos homes que agrediron a Irene.

Outros homes que recollían sinaturas na porta do hospital Álvaro Cunqueiro increparon a Lara cando ela lles pediu a licenza para facelo. O mesmo ocorreu con Antía. En canto a Atenea, recollérona no mesmo instante e a cousa non foi a máis. “Están á desesperada” opina Irene. “En Vigo hai mar, non nos fai falta unha piscina, e dous dos sete centros comerciais da cidade teñen problemas, non precisamos máis espazos dese tipo”.