Servicios públicos
Enquístase a folga do funcionariado de xustiza

A folga de funcionarios da xustiza en Galiza alóngase. Os sindicatos presentaron unha solicitude para retomar as negociacións interrompidas, pero seguen sen resposta da Xunta. A última xuntanza foi o 26 de marzo.

O conflito comezou o 3 de outubro. O Comité sindical presentou entón un informe denunciando, por un lado, unha situación de inferior retribución económica con respecto a outras comunidades a pesar de seren funcionarios do Estado e, polo outro, un cadro de persoal insuficiente para atender as demandas. As negociacións avanzaron ata que a Xunta cambiou aos interlocutores a mediados de xaneiro. A folga comezou o 7 de febreiro. E ata hoxe.

As competencias de xestión están trasladadas á Xunta desde 1996, ao igual que noutras once comunidades autónomas. O orzamento devén dos Presupuestos Generales del Estado (PGE) salvo o Complemento Autonómico Transitorio (CAT), denominación que varía en cada comunidade. No momento da transferencia de competencias, Galiza tiña aos seus funcionarios no termo medio da táboa, pero mentres outras autonomías foron renovando os seus acordos, Galiza quedou á cola. Comparando a retribución económica con Cantabria, de PIB semellante, os funcionarios reciben 200 euros menos mensuais.

Os sindicatos reclaman a consolidación de prazas fixas que son cubertas por interinos, así como a recuperación de 106 prazas perdidas nas Audiencias Provinciais desde 2012. Ese ano, a Dirección Xeral de Xustiza elaborou un plan de amortización polo cal esas prazas vacantes non volvían saír a concurso, aínda que o Ministerio permitiu só dez. Tino Novoa, de CC.OO. Xustiza, afirma que “non houbo un investimento suficiente, e iso reflíctese en cuestións coma o atraso” na convocatoria de prazas.

O Ministerio fixo un plan de amortización de 106 prazas polo cal as que foran quedando vacantes (por xubilación ou outros motivos) non serían cubertas, porque as bloqueaban e non as sacaban a concurso. A cousa é que o Ministerio permitiu só 10. Por un lado, os sindicatos reclaman a súa recuperación ou a creación de postos de apoio. Polo outro, que implica tamén que vía PGE a Xunta estea recibindo fondos coma se tivesen esas prazas.

En canto á retribución económica reclaman a eliminación dos descontos salariais por incapacidade laboral temporal, que supón o 50% nos tres primeiros días e o 25% nos seguintes -e que non sofren os outros estamentos cos que traballan-, e o cobro do mesmo salario que recibirían os titulares das substitucións de corpos superiores, ademais da equiparación do CAT.

NEGOCIACIÓNS QUE NON EXISTEN

As negociacións entre a Xunta e os sindicatos con mediación do Consello de Relacións Laborais avanzaban en todos os puntos. Pero a mediados de xaneiro o Goberno situou á Consellería de Facenda á fronte, rexentada por Valeriano Martínez. Pablo Valeiras, portavoz do comité de folga, denuncia que “as negociacións como tal non existen. Chegan á mesa, presentan unha oferta, e se non aceptamos, levántanse. Así ata que nos volven chamar quince días máis tarde”.

Alfonso Rueda, número dous do goberno de Feijóo, estivera presente nas primeiras xuntanzas pero deixou de asistir pese a ser a cara visible da Xunta no conflito. Fontes sindicais apuntan a que Rueda, posible candidato a suceder a Feijóo no goberno, perdeu a batalla. Valeriano Martínez, alongando as negociacións, estaría desgastando a Rueda. Un dos posibles beneficiados desta situación sería Francisco Conde, outro posible candidato, hoxe Conselleiro de Economía, Emprego e Industria.

“QUE MIGREN”

“Se non están de acordo [coa oferta da Xunta] que migren”, expoñía en febreiro o director xeral de Función Pública, José María Barreiro. Entón chegou a folga, con ata un 95% de seguimento, segundo datos sindicais. Actualmente atoparíanse por riba do 80%, segundo as mesmas fontes. O comité denunciou os servizos mínimos por consideralos abusivos ante o Tribunal Superior de Xustiza, sen recibir resposta. Máis tarde, a Xunta emitiu un informe declarando que os servizos mínimos eran insuficientes. Despois, o tribunal mandou unha directriz a través da Secretaría de Goberno aseverando que era necesario propor un aumento. Ademais, o 4 de decembro a Cámara aprobou unha moción pola cal se instaba ao Goberno a resolver o problema, incluído o voto da propia bancada popular, pero a Xunta non está a cumprir o mandato parlamentario.

“Salvo causas excepcionais que vemos en dereito penal ou de familia, a maioría de xuízos están sen celebrarse”, explica Javier Villar, que colabora cos xulgados da Parda. Ao redor duns 18.500 xuízos xa foron suspendidos. Varios xulgados do Social en Vigo están citando para finais de 2019. Novoa reclama que “a folga non só é un problema para nós, senón para toda a cidadanía. Poucas veces vimos na administración un conflito destas características. Por iso, a Xunta debería sentar a negociar”.

Cando remate a folga haberá unha sobrecarga de traballo para todos os estamentos. Os avogados que agora non teñen procesos terán unha sobrecarga por mor dos prazos computados. A fiscalía, cuxos procesos de xestión son levados por funcionarios, atópase nunha situación de certa parálise. Así todos os corpos.

Alfonso Rueda afirmou que a oferta do Goberno “suporía máis de 300 euros máis ao mes para cada traballador”. Os sindicatos afirman que, se iso fose verdade, firmaríano no acto. Así, as centrais sindicais pediron na última xuntanza un aumento do CAT de 180 euros. A oferta por parte da Administración foi de 135 euros para forenses, 108 para tramitadores e 105 para corpos de auxilio sen explicar os prazos nos que revisaría a suba. Queda moito por negociar.