O prelo
A banda deseñada de Rubín: o consultorio “psicoanímico” que precisamos

A banda deseñada galega remóntase a décadas atrás. Hai quen toma a Castelao mesmo como un dos precursores do que despois foi un campo prolífico de autores e autoras que son recoñecidas a nivel mundial. 

Este é o caso do ourensán David Rubín, animador, escritor e debuxante de banda deseñada que xa ten sido traducido a múltiple idiomas. Foi Autor Revelación polo Salón de cómic de Barcelona, estivo nomeado no Premio Nacional de cómic e acostuma traballar con editoriais e autores como o mesmo Neil Gaiman para a adaptación de Norse Mythology, proxecto que aínda está no forno. 

Mais, a pesar da calidade e cantidade de creadoras galegas de banda deseñada, a maioría das obras que a industria editorial publica son en castelán. Non foi senón ata o 2010 cando se publicou unha banda deseñada completamente en galego. Uxío Novoneyra: A voz herdada foi distribuído pola Xunta de Galicia de a balde por ser unha homenaxe ao Novoneyra. 

O salón de té do oso malaio foi publicado en castelán no 2006 e, antes de que chegara ás librarías en galego, xa se lera en italiano e ruso. Máis os tebeos que compoñen o libro foron, hai moitos anos atrás, orixinalmente escritos e publicados en galego na revista Dos veces libre. 

Demo Editorial é un proxecto que no 2008 xurdiu como unha iniciativa de autoedición do autor Manuel Cráneo que agora conta con máis de 40 títulos converténdose nun importante impulsor da banda deseñada galega. Foi esta editorial a que o ano pasado editou en Galicia O salón de té do oso malaio, unha obra que te atrapa dende o primeiro tebeo.

Todo o libro lévase a cabo no local do oso Sigfrido: un consultorio psicoanímico que, baixo a mirada dos concorrentes, é un salón de té onde van a falar con Sigfrido que sempre lles escoita e ten a infusión perfecta para reanimar a cada quen. 

Alí coñecemos a Caetano Xiz, un súper heroe que cae en desgraza cando queda cego, a un felino atormentado polos seus erros, a un pai que está disposto a enfrontar calquera perigo con tal de protexer á súa filla e moitísimos personaxes máis que van compoñendo o universo de Rubín. 

Cada un dos capítulos demostran o talento do autor. Non son só historias orixinais e maxistralmente narradas a través das viñetas, senón que tamén abordan temas que desenvolve dun xeito profundo e sensíbel. O salón de té do oso malaio trata da morte e de como afrontar o loito, da amizade incondicional, da soidade, da importancia de lembrar e celebrar a vida dos que foron heroes na vida real, do desamor e de como aprender a saír adiante. 

O ambiente do mundo que describe David, o carácter e o deseño gráfico dos seus personaxes, están construídos dun xeito tan complexo que, a pesar dos curtos que son os capítulos, resulta natural empatizar con eles, en especial con Sigfrido, xa que terminas por desexar que o salón de té existira realmente. Non é casualidade: o consultorio psicoanímico do oso malaio é un espazo onde se pode falar sen medo aos xuízos, onde sempre hai alguén que te escoite de verdade e que estea disposto a botarche unha man. A obra de David Rubín é unha oda á amizade que nos lembra que calquera situación vívese mellor acompañado. 

A edición desta banda deseñada, da cal é evidente o coidado da ilustración na portada, saiu do prelo de Demo Editorial e é unha oportunidade máis para enganchar, aos que non o estean aínda, ao mundo do cómic e introducilos á calidade dos proxectos galegos. 

E, xa que hai traballo de David Rubín na nosa lingua, só queda esperar que non sexa a derradeira nin que tarde a seguinte.