Galicia
Nota de rectificación da CRTVG sobre a adxudicación dun plan de publicidade

1. “O Salto” afirma no parágrafo primeiro:“A dirección da CRTVG acaba de adxudicar un dos seus maiores contratos do ano no medio da maior crise de reputación da súa historia para, fundamentalmente, pagar publicidade. (...) Isto é, máis de medio milón de euros para pagar cuñas de radio, banners en diarios dixitais e anuncios nas páxinas impresas da prensa hexemónica en Galiza.”

Esta información é falsa. O obxecto deste contrato, como aparece perfectamente descrito nas cláusulas administrativas, non é a adxudicación dun plan de publicidade para potenciar a imaxe da CRTVG en ningures, senón a contratación dunha empresa especializada en xestionar, promocionar e vender espazos publicitarios na CRTVG ás empresas galegas que teñan interese en anunciarse na CRTVG. A licitación dun exclusivista é un sistema de traballo recorrente que conta con máis dunha década de antiguidade, polo que tamén é falsa e carece de sentido a ligazón que se pretende facer no texto cunha suposta crise reputacional cando a TVG é a canle máis vista de Galicia en 2024, segundo os datos oficiais do Estudo Xeral de Medios.

As cláusulas administrativas do contrato din de forma clara:

“O obxecto deste contrato consiste na comercialización (xestión, promoción, venda e xestión de cobro) dos espazos publicitarios da Corporación Radio e Televisión de Galicia, S.A. que se correspondan co mercado publicitario autonómico galego, entendendo por tal o constituido por campañas de ámbito galego promovidas por anunciantes e/ou axencias residenciadas nesta comunidade autónoma.”

2. “O Salto” afirma: “Con todo, ningún cidadán nin cidadá pode acceder ao detalle desa repartición do seu diñeiro público.”

Esta afirmación é falsa. No prego ao que se refire “O Salto” non hai ningún tipo de reparto, xa que só pode haber un único adxudicatario. Trátase dun concurso aberto e no portal de Contratos de Galicia (https://www.contratosdegalicia.ga//licitacion?OP=50&N=823666&lang=gl) están publicadas as actas da mesa de contratación, onde se indican as puntuacións de cada un dos licitantes. Esta información é pública e accesible para calquera cidadán.

3. “O Salto” afirma: “Ao subcontratar nun gran lote o diñeiro que se reparte aos medios de comunicación normalmente afin ao partido gobernante, non publican a desagregación desa repartición nas plataformas de transparencia. Tampouco as marxes de beneficio que quedan insercións publicitarias están a prezo de mercado ou non. A priori, só se accede ao montante nas compañías que os xestionan nin, por suposto, se pode coñecer se os prezos pagos polas total: 751.193,13 euros de diñeiro público que se levou a sociedade Xacovision. A repartición? Pódense facer suposicións, pero pouco máis polo de agora.”

Esta información é falsa porque parte dunha premisa falsa: que o contrato é para a compra de espazos noutros medios de comunicación para publicar ou emitir publicidade da CRTVG. Como quedou expresado no primeiro punto, este contrato ten como obxectivo precisamente o contrario do afirmado no xornal “O Salto”; isto é, a contratación dunha empresa especializada en captar anunciantes para os medios da CRTVG. Polo tanto, non existe posibilidade de establecer ningún tipo de prezo nin de beneficios doutros medios.

4. “O Salto” afirma: “A CRTVG leva seguindo este modelo de subcontratación e opacidade durante anos." Esta información é talsa porque todos os pregos de contratación para a xestión e promoción da publicidade na CRTVG foron publicados conforme á lei e accesibles nas plataformas públicas de contratación, así como en todos os diarios oficiais establecidos na normativa vixente.

5. “O Salto” afirma: “A memoria argumenta a licitación conxunta dos contratos da seguinte maneira: 'A comercialización da publicidade dispoñible dos medios (televisión, radio e dixital) require que sexa realizada por unha única empresa para mellor aproveitamento da estrutura dispoñible para a execución do contrato e o aproveitamento da transversalidade de medios que poidan xerarse. Xusto o contrario do que fan todas as consellerías do Goberno galego e as súas axencias públicas, que reparten diñeiro público a dedo e sen concurso.”

Esta interpretación feita por “O Salto” da memoria de contratación é falsa e carece de todo sentido. O prego establece que unha soa empresa debe encargarse da xestión e promoción dos espazos publicitarios emitidos nos medios da CRTVG porque se require a comercialización conxunta dos espazos en TVG, Radio Galega e plataformas dixitais. O obxectivo é garantir a venda conxunta de todos os soportes dispoñibles, algo imposible de lograr se houbese varias empresas encargadas segundo o tipo de soporte.

Como xa quedou patente, a licitación mencionada refírese á venda de espazos publicitarios para anunciarse na CRTVG, e non ten relación algunha con contratos para a compra de espazos publicitarios para a promoción da CRTVG noutros medios de comunicación.